සනත් - ජානකී විවාහය දෙදරා යයි? 💔🎥

ශ්‍රී ලාංකේය සිනමා ක්ෂේත්‍රයේ ඉමහත් ප්‍රසිද්ධියක් ඉසිලූ ප්‍රවීණ රංගන ශිල්පී සනත් ගුණතිලක සහ ප්‍රකට චිත්‍රපට නිෂ්පාදිකා ජානකී විජේරත්න අතර විවාහය මේ වන විට අවසන් වී ඇති බවට තොරතුරු අනාවරණය වෙයි. කලා ක්ෂේත්‍රයේ බොහෝ දෙනෙකුගේ ආශිර්වාදය මැද චාම් උත්සවයකින් විවාහ දිවියට එළඹුණු මෙම යුවළගේ වෙන්වීම පිළිබඳ පුවත මේ වන විට "ප්‍රසිද්ධ රහසක්" බවට පත්ව තිබේ.

මෑත කාලීනව ජානකී විජේරත්න සිය සමාජ මාධ්‍ය ගිණුම්වල පළ කරන ඡායාරූප කිසිවක සනත් ගුණතිලක පෙනී නොසිටීම මෙම සැකය තවදුරටත් තහවුරු කිරීමට හේතු වී ඇත. ඔවුන් දෙපළ අවසන් වරට ප්‍රසිද්ධ උත්සවයකදී පෙනී සිටියේ "සුර දෙටුවෝ" චිත්‍රපටය නැරඹීමට පැමිණි අවස්ථාවේදීය. රංගන ශිල්පිනියක සහ නිවේදිකාවක ලෙස කලා දිවිය ආරම්භ කළ ජානකී, වර්තමානයේ ලයිකා (Lyca) නිෂ්පාදන සමාගමේ ශ්‍රී ලංකා උප සභාපතිනිය ලෙස දැවැන්ත වගකීමක් දරන අතර සනත් ගුණතිලක මෙරට සිනමාවේ අසහාය නළුවකු ලෙස දශක කිහිපයක් වැජඹුණු අයෙකි.

ඔවුන්ගේ ආදර කතාව ආරම්භ වූයේ "රාණි" චිත්‍රපටයේ වැඩකටයුතු අතරතුරදීය. එකල සනත් ගුණතිලක ප්‍රකාශ කර සිටියේ තමන්ගේ වයස සහ ජීවන තත්ත්වය සලකා බලා කටකතාවලට ඉඩ නොතබා ඉතා ඉක්මනින් විවාහ වීමට තීරණය කළ බවයි. "මට ඇය ගැන දැනුණු දේ සහ ඇයට මා ගැන දැනුණු දේ සමීප සබඳතාවක් ඇති වෙලා විවාහයකින් කෙළවර වෙන්න තරම් සුදුසුයි කියලා දෙන්නම තීරණය කළා" යැයි එදා සනත් ගුණතිලක පවසා තිබුණි. එසේම ජානකීගෙන් තම වෘත්තීය ජීවිතයට විශාල රුකුලක් ලැබෙන බවත් ඔහු ඉතාමත් ගෞරවයෙන් එදා සිහිපත් කළේය.

කෙසේ වෙතත්, වයස අවුරුදු 69 ක් වන සනත් ගුණතිලක මහතා සිය ජීවිතයේ සැඳෑ සමය ගෙවමින් සිටින මෙවන් වකවානුවක මෙම වෙන්වීම සිදුවීම කලා ක්ෂේත්‍රයේ බොහෝ දෙනෙකුගේ කනගාටුවට හේතු වී ඇත. ඔවුන්ගේ අදහස්වල නොගැළපීමක් හෝ වෙනත් පෞද්ගලික හේතුවක් මත මෙම තීරණය ගෙන ඇති බවට වාර්තා වුවද, දෙපාර්ශ්වයම මේ පිළිබඳව මෙතෙක් නිල වශයෙන් ප්‍රකාශයක් සිදු කර නොමැත.

Copy Chanal E