අද කාලේ විදුලි බිල කියන්නේ හැමෝටම තියෙන ලොකු ප්රශ්නයක්. ගොඩක් වෙලාවට අපි විදුලි බිල වැඩි වෙන්නේ ඇයි කියලා හොයද්දී ශීතකරණය (Fridge) ගැන වැඩි අවධානයක් යොමු කරන්නේ නැහැ. විශේෂයෙන්ම ශීතකරණයක් තබා ඇති ආකාරය අනුව විදුලි බිල 10% සිට 20% දක්වා වෙනස් විය හැකි බව ඔබ දන්නවාද? ඔබේ ෆ්රිජ් එක බිත්තියටම හේත්තු කර තැබීම මෙලෙස විදුලි බිල වැඩි වීමට බලපාන ප්රධානතම තාක්ෂණික හේතුවක්.
ශීතකරණය ක්රියාත්මක වෙද්දී එහි පිටුපස ඇති කොන්ඩෙන්සර් දඟර (Condenser Coils) මගින් ෆ්රිජ් එක ඇතුළේ තියෙන තාපය පිටතට මුදා හරිනවා. මේ තාපය පිටවීමට නම් ශීතකරණය පිටුපස හොඳ වාතාශ්රයක් තිබිය යුතුයි. ඔබ ශීතකරණය බිත්තියටම හේත්තු කර තැබූ විට, මේ රස්නය පිටවීමට ඉඩක් නැතිව එතැනම රැඳී පවතිනවා. එවිට ශීතකරණයට නියමිත සීතල ලබා දීම සඳහා එහි කොම්ප්රෙෂරය (Compressor) සාමාන්යයට වඩා වැඩි වෙලාවක් සහ වැඩි ශක්තියක් යොදාගෙන වැඩ කිරීමට සිදු වෙනවා.
මෙලෙස කොම්ප්රෙෂරය අඛණ්ඩව ක්රියාත්මක වීම නිසා ඔබේ විදුලි මීටරය වේගයෙන් කැරකෙන අතර, එය මාසය අවසානයේ කරන්ට් බිල රොකට් එක වගේ ඉහළ යාමට හේතු වෙනවා. එපමණක් නොව, දිගින් දිගටම මෙලෙස අධික ලෙස රත් වෙමින් වැඩ කිරීම නිසා කොම්ප්රෙෂරයේ ආයු කාලය අඩු වී කෙටි කලකින්ම ශීතකරණය අලුත්වැඩියා කිරීමට සිදු විය හැකියි.
විදුලි බිල අඩු කරගන්න ඔබ කළ යුත්තේ කුමක්ද?
ඔබේ ශීතකරණය සහ බිත්තිය අතර අවම වශයෙන් අඟල් 6කවත් (පොඩි අඩියක්) පරතරයක් තබන්න.
ශීතකරණය දෙපසින් සහ ඉහළින් ද වාතය ගලා යාමට ප්රමාණවත් ඉඩක් ලබා දෙන්න.
ෆ්රිජ් එක පිටුපස ඇති දඟර මත දූවිලි බැඳී ඇත්නම් ඒවා වරින් වර පිරිසිදු කරන්න.
මෙවැනි සරල වෙනස්කම් කිහිපයක් කිරීමෙන් ඔබේ විදුලි බිල සැළකිය යුතු ලෙස අඩු කරගැනීමටත්, ඔබේ වටිනා ශීතකරණය ආරක්ෂා කරගැනීමටත් පුළුවන්.
0 Comments