ශ්රී ලංකාවේ සම්බුද්ධ ශාසනයට එරෙහිව විවිධ බලවේග විසින් දියත් කර ඇති බව කියන යටිකූට්ටු කුමන්ත්රණ සහ මෑත කාලීනව භික්ෂූන් වහන්සේලා ඉලක්ක කර ගනිමින් සිදුවන සිදුවීම් පිළිබඳව පැපිලියාන සුනේත්රාදේවි පරිවේනාධිපති මහාචාර්ය මැදගොඩ අභයතිස්ස නාහිමියන් විසින් අතිශය තීරණාත්මක ප්රකාශයක් සිදු කර තිබේ. අපවත් වී වදාළ අතිගෞරවාර්භ කලවින්නේ ධම්මරක්ඛිත නාහිමිපාණන්ගේ ආදාහන පූජෝත්සවය අමතමින් උන්වහන්සේ අවධාරණය කළේ,
යම් යම් පිරිස්වල උගුල්වලට හසු වී මත්ද්රව්ය වැනි චෝදනාවලට ලක්වන තරුණ භික්ෂූන් වහන්සේලා සම්බන්ධයෙන් හදිසි තීරණ ගෙන ඔවුන් සිවුරු හැරවීමට කටයුතු නොකළ යුතු බවයි. මෙම ප්රකාශය තුළින් උන්වහන්සේ පෙන්වා දෙන්නේ ශාසනය විනාශ කිරීමේ අරමුණින් ක්රියා කරන බලවේගවල අවශ්යතාවය ඉටු කිරීමට මහා සංඝරත්නය ඉඩ නොතැබිය යුතු බවයි.
මැදගොඩ අභයතිස්ස හිමියන් පෙන්වා දෙන්නේ වර්තමානයේ ඇතැම් භික්ෂූන් වහන්සේලා කිසිවකුගේ හෝ සැලසුම් සහගත යටිකූට්ටු වැඩකට ගොදුරු වී මත්ද්රව්ය සමඟ අත්අඩංගුවට පත්වන අවස්ථාවන් වාර්තා වන බවයි. මෙවැනි තත්ත්වයකදී උන්වහන්සේලා විනයානුකූලව සිවුරු හැරවීමේ අවශ්යතාවයක් තිබේද යන්න පිළිබඳව ගැඹුරින් සිතා බැලිය යුතු බව උන්වහන්සේ අවධාරණය කරති. "මේ තරුණ භික්ෂූන් වහන්සේලා ලොකු ගැටයකට අහුවෙලා තියෙනවා. අපිට පේන්නේ උන්වහන්සේලා ලොකු උගුලකට අහුවෙලා තියෙනවා නම් ඒ ගැන හරියට සොයාබලා තීරණ ගැනීම වැදගත්" යනුවෙන් පවසමින් උන්වහන්සේ පෙන්වා දෙන්නේ සැකකරුවන් ලෙස උසාවියට ඉදිරිපත් කිරීමට පෙර සිවුරු හැරවීම අනාගතයේදී මහා හානියක් විය හැකි පූර්වාදර්ශයක් වන බවයි.
අපවත් වී වදාළ කලවින්නේ ධම්මරක්ඛිත නාහිමියන්ගේ ශාසනික මෙහෙවර ඇගයීමට ලක් කරමින් අභයතිස්ස හිමියන් කියා සිටියේ, උන්වහන්සේ හරි වැරැද්ද පෙන්වා දීමට දක්ෂ, ආදර්ශමත් හිමිනමක් වූ බවයි. භික්ෂූන් වහන්සේලා යනු තමන් පසුපස විශාල පිරිසක් පැමිණෙන බව දැනගෙන සිය චර්යාව තුළින් අන් අය හික්මවන පිරිසක් විය යුතු බව ද උන්වහන්සේ සිහිපත් කළහ. ශාසනයේ මතු පැවැත්ම සඳහා ඊළඟ පරම්පරාවට මෙම පිළිවෙත නිවැරදිව භාර දිය යුතු බවත්, භික්ෂූන් වහන්සේලා ශාසනයේ අන්තිමයා නොවිය යුතු බවත් උන්වහන්සේ මෙහිදී අවධාරණය කළහ. ශාසනය යනු ගසට පොත්ත මෙන් දායක කාරකාදීන් සමඟ බැඳී පවතින්නක් බැවින්, එහි වැටීමක් සිදුවන විට ගිහි පැවිදි දෙපාර්ශ්වයම එක්ව එය ආරක්ෂා කර ගත යුතු බව උන්වහන්සේගේ අදහස විය.
විශේෂයෙන්ම සතුරාගේ අවශ්යතාවය අපේ අවශ්යතාවය නොවිය යුතු බව පවසමින් මැදගොඩ අභයතිස්ස හිමියන් පෙන්වා දුන්නේ, ශාසනය තුළ මතු වන ප්රශ්නවලදී නායක හිමිවරුන් ස්ථාවර සහ බුද්ධිමත් තීරණ ගත යුතු බවයි. හදිසි කෝපය හෝ සමාජ පීඩනය මත පදනම්ව භික්ෂූන් වහන්සේලා කෙරෙහි තීන්දු ගැනීම මගින් සසුනට එරෙහි බලවේගවල අරමුණු ඉටු වන බව උන්වහන්සේ පවසති. "යථා අපරාධ ශාසනය" ලෙස හඳුන්වන මෙම ශාසනය තුළ විනය තීරණ ගැනීමේදී අතිශය ප්රවේශම් විය යුතු බව උන්වහන්සේගේ කතාවේ සාරාංශය විය. මහරගම නාවින්න මහජන ක්රීඩාංගණයේදී පැවැති මෙම ආදාහන පූජෝත්සවයේදී උන්වහන්සේ කළ මෙම ප්රකාශය මේ වන විට රට පුරා දැඩි අවධානයට ලක්ව තිබේ.
0 Comments