මම චීනයේ ඉද්දි මට හොරෙන් ප්‍රභාකරන්ව බේරගන්න ගිය හැටි මෙන්න" - සරත් ෆොන්සේකාගෙන් වීඩියෝ සාක්ෂි සහිතව රාජපක්ෂවරුන්ට එරෙහිව මාරාන්තික හෙළිදරව්වක්

2009 මැයි 17 වන දින යුද්ධය නිමාවීමට මොහොතකට පෙර සිදුවූ අතිශය රහසිගත සිදුවීම් පෙළක් පිළිබඳව ෆීල්ඩ් මාර්ෂල් සරත් ෆොන්සේකා මහතා විසින් විශේෂ හෙළිදරව්වක් සිදු කර තිබේ. එවකට හමුදාපතිව සිටි තමන්ව මඟහරිමින්, රාජපක්ෂවරුන් එල්.ටී.ටී.ඊ නායකයින් බේරාගැනීම සඳහා ජාත්‍යන්තරය සමඟ රහස් ගනුදෙනුවක නිරත වූ බව ඔහු පවසයි.

2009 මැයි 17 වනදා දහවල් කාලයේදී තමන් චීනයේ සංචාරයක නිරතව සිටි බවත්, තමන්ට දැනුම් දීමකින් තොරව මහින්ද, ගෝඨාභය සහ බැසිල් යන මහත්වරුන් එල්.ටී.ටී.ඊ නායකයින්ට යටත් වීමට අවස්ථාව ලබාදීමට සාකච්ඡා කළ බවත් ඔහු අනාවරණය කරයි.

 මෙම යටත් වීමේ ක්‍රියාවලිය සඳහා ICRC සහ ඇම්නෙස්ටි ඉන්ටර්නැෂනල් වැනි ආයතන සමඟ එවකට රජයේ ප්‍රධානීන් සෘජුවම සම්බන්ධ වී ඇති බව ෆොන්සේකා මහතා පවසයි.

2008 වසරේ සිටම මහින්ද රාජපක්ෂ සහ ගෝඨාභය රාජපක්ෂ යන මහත්වරුන්ට යුද්ධය කඩාකප්පල් කිරීමට සහ එය ප්‍රමාද කිරීමට අවශ්‍යතාවයක් තිබූ බවට ඔහු මෙහිදී බරපතල චෝදනාවක් එල්ල කරයි.

'සුදු කොඩි' නඩුව සහ මාධ්‍ය මෙහෙයුම: තමන්ට එරෙහිව පසුව ගොනු කළ 'සුදු කොඩි' නඩුව යනු රාජපක්ෂවරුන් විසින් මාධ්‍යවේදීන් ලවා නිර්මාණය කරන ලද සම්පූර්ණ අසත්‍යයක් බවත්, එම වීඩියෝව පටිගත කළ මාධ්‍යවේදියා පවා ගෝඨාභය රාජපක්ෂ මහතාගෙන් බේරීමට රටින් පලාගිය බවත් ඔහු පවසයි.

එම අවස්ථාව වන විට එල්.ටී.ටී.ඊ ය මීටර් 400x400 ක කුඩා භූමියකට කොටු කර තිබූ බවත්, තමන්ගේ නියෝගය වූයේ යටත් කරගැනීම නොව ඔවුන්ව සම්පූර්ණයෙන්ම විනාශ කිරීම බවත් ෆොන්සේකා මහතා වැඩිදුරටත් අවධාරණය කරයි.