අමෙරිකානු ආරක්ෂක අංශවලට අනුව, ඉරානය විසින් මෙම ප්රහාරය සඳහා මිසයිල, ඩ්රෝන යාත්රා සහ කුඩා ප්රහාරක යාත්රා විශාල ප්රමාණයක් යොදා ගෙන ඇත. කෙසේ වෙතත්, අමෙරිකානු නාවික හමුදාවේ පවතින දියුණු ආරක්ෂක පද්ධති හේතුවෙන් එම ප්රහාර සාර්ථකව මැඩපැවැත්වීමට ඔවුන් සමත් වී ඇති අතර, කිසිදු අමෙරිකානු යුද නැවකට හානියක් සිදුව නොමැති බව තහවුරු කර තිබේ. මෙම ප්රහාරය තහවුරු කරමින් අමෙරිකානු හමුදා ප්රකාශකයන් සඳහන් කර සිටින්නේ, තම 'ආත්ම ආරක්ෂාව' වෙනුවෙන් ඉරානය වෙත වහාම ප්රතිප්රහාර දියත් කිරීමට තමන්ට සිදුවූ බවයි. ඒ අනුව ඉරාන හමුදා සතු මිසයිල සහ ඩ්රෝන දියත් කිරීමේ මධ්යස්ථාන, අණදෙන හා පාලන මධ්යස්ථාන මෙන්ම බුද්ධි තොරතුරු මෙහෙයුම් පහසුකම් ඉලක්ක කර ගනිමින් අමෙරිකාව සිය මෙහෙයුම ක්රියාත්මක කර තිබේ.
මේ අතර, ඉරාන රාජ්ය මාධ්ය වාර්තා කරන්නේ හෝමුස් සමුද්ර සන්ධිය ආශ්රිත Qeshm Island ඇතුළු වෙරළබඩ ප්රදේශ කිහිපයක ප්රබල පිපිරීම් හඬ ඇසුණු බවයි. බන්ඩර් අබ්බාස් (Bandar Abbas) ආසන්න ප්රදේශයේදී සතුරු බළකා සමඟ ඉරාන සන්නද්ධ හමුදා සෘජු වෙඩි හුවමාරුවක පවා නිරත වී ඇති බව එම වාර්තාවල දැක්වේ. ඉරානය මෙම සිද්ධිය සම්බන්ධයෙන් අමෙරිකාවට ප්රතිවිරුද්ධ චෝදනාවක් එල්ල කරයි. ඔවුන් පවසන්නේ හෝමුස් සමුද්ර සන්ධියට ඇතුළු වූ සිය තෙල් නෞකාවකට සහ තවත් යාත්රාවකට අමෙරිකාව විසින් ප්රහාරයක් එල්ල කළ බවයි. එමෙන්ම අමෙරිකානු ප්රහාර සිවිල් ප්රදේශ ඉලක්ක කර සිදු කිරීමෙන් ඔවුන් පවතින සටන් විරාමය උල්ලංඝනය කර ඇති බවට ද ඉරානය බරපතල ලෙස චෝදනා නගයි.
කලාපය මෙලෙස යුද ගින්නෙන් ඇලලී යද්දී අමෙරිකානු ජනාධිපති ඩොනල් ට්රම්ප් මහතා විශේෂ ප්රකාශයක් සිදු කර තිබේ. ඔහු පවසන්නේ කලාපයේ උණුසුම් තත්ත්වයක් සහ සන්නද්ධ ගැටුම් පැවතියද, දෙපාර්ශවය අතර මීට පෙර එකඟ වූ සටන් විරාමය තවමත් බලපැවැත්වෙන බවයි. කෙසේ වෙතත්, තම හමුදාවන්ට එල්ල වන ඕනෑම ප්රහාරයකට දැඩිව ප්රතිචාර දැක්වීමට පසුබට නොවන බවට ද ඔහු අනතුරු අඟවා ඇත. හෝමුස් සමුද්ර සන්ධිය යනු ලෝකයේ තෙල් ප්රවාහනයෙන් තුනෙන් එකක් සිදුවන ස්ථානයක් බැවින්, මෙහි ඇති වන කුඩා හෝ ගැටුමක් ලෝක වෙළඳපොළේ තෙල් මිල ඉහළ යාමට සෘජුවම බලපායි. ඉදිරි දිනවලදී මෙම ගැටුම සමනය වේද නැතහොත් පූර්ණ පරිමාණ යුද්ධයක් දක්වා වර්ධනය වේද යන්න පිළිබඳව මුළු ලෝකයම දැඩි විමසිල්ලෙන් පසුවේ.
0 Comments