පේෂානි ඒකනායක ගැන ව්‍යාජ පුවත් පැතිරවූ තරුණයා ප්‍රසිද්ධියේම සමාව ඉල්ලයි!

පසුගිය දින කිහිපය පුරා සමාජ මාධ්‍ය ඔස්සේ ජනප්‍රිය රංගන ශිල්පිනී පේෂානි ඒකනායක ඉලක්ක කරගනිමින් පැතිරුණු ව්‍යාජ පුවතක් සම්බන්ධයෙන්, එය මුලින්ම ප්‍රචාරය කළ පුද්ගලයෙකු ප්‍රසිද්ධියේම සිය කනගාටුව පළ කරමින් සමාව ඉල්ලා තිබේ.

ප්‍රමුඛ පෙළේ පුවත් වෙබ් අඩවියක (News Center) ලාංඡනය (Logo) හොර රහසේ භාවිතා කරමින් සකස් කරන ලද මෙම පෝස්ට් එක, සැබෑ පුවතක් යැයි සිතා තමන් ශෙයාර් කළ බවත්, පසුව එය ව්‍යාජ එකක් බව හඳුනා ගැනීමෙන් පසු ඉවත් කළ බවත් ගිෂාන් විජේරත්න නමැති තරුණයා සිය ෆේස්බුක් ගිණුමේ සටහනක් තබමින් පවසා ඇත. පේෂානි සමඟ දුරකථනයෙන් කතා කර පෞද්ගලිකව ද සමාව ඉල්ලා ඇති ඔහු, අසත්‍ය ප්‍රචාර නිසා කාන්තාවන් අපහසුතාවයට පත් නොකරන ලෙසත්, අන් අයව Troll කිරීමෙන් වළකින ලෙසත් සමාජ මාධ්‍ය පරිශීලකයින්ගෙන් ඉල්ලා සිටියි.

මෙම සිද්ධිය සම්බන්ධයෙන් පේෂානි ඒකනායක මීට පෙර අපරාධ පරීක්ෂණ දෙපාර්තමේන්තුවට (CID) පැමිණිල්ලක් ද ඉදිරිපත් කළාය. ඇය අවධාරණය කරන්නේ තමන්ගේ ප්‍රතිරූපයට හානි කරන පුද්ගලයින්ට එරෙහිව නීතිය ක්‍රියාත්මක කිරීමට තමන් පසුබට නොවන බවයි.